आत्महत्या की हत्या?

'मुलगी म्हणून अयशस्वी ठरले होते मग पत्नी म्हणून अयशस्वी ठरले आणि आता असं वाटत होतं की आई म्हणून देखील!
हे जीजस, का माझी परीक्षा पाहता? माझा स्वभाव सहनशील आहे, माझ्याकडे संयम खूप आहे म्हणून इतकी परीक्षा पहायची का? आई-वडिलांच्या मनाविरुद्ध नवरा पसंत केला म्हणून त्यांना वाटलं आदर्श मुलगी नाही होऊ शकली. मान्य केलं, आहे त्या परिस्थितीत संसार केला. नवऱ्याने आर्थिक अडचण असेपर्यंत तिच्याशी चांगले संबंध ठेवले. तिने देखील बरोबरीत नोकरी करून संसाराला हातभार लावला. सोन्यासारख्या दोन मुली झाल्या.
मग त्याला चांगली नोकरी लागली, पगार वाढली आणि हळूहळू त्याने तिच्याकडे दुर्लक्ष सुरू केले. त्याचवेळी त्याच्या मोठ्या भावाचे अपघाती निधन झालं आणि त्याची सुंदर नाजूक वहिनी कोलमडून गेली. त्या वहिनीची काळजी घेण्यासाठी त्यांनी वहिनीकडे इतकं लक्ष द्यायला सुरुवात केली की स्वतःच्या संसाराकडे पूर्ण दुर्लक्ष केलं. दिसायला साधारण असणाऱ्या ग्रेसीपुढे , मुलबाळ नसणारी नाजूक वहिनी तशी उजवीच होती.
हे सगळं जुना आता आठवायला लागलं होतं . तिच्या मुलींनी कधीच तक्रारी केल्या नाहीत कारण तिच्यासारख्या सहनशीलच होत्या पण धाकटी मुलगी एंजल नंतर खूप हळवी झाली होती. मोठी होताहेत तिच्याकडे संयम नव्हता. प्रत्येक गोष्टीत काय तो सोक्षमोक्ष एकदाच लावायचा असा स्वभाव तयार झाला. त्याचं कारण कुटुंबाचं विलग होणं!