स्फूर्ती २

गोवऱ्या थापून ती पुन्हा घराकडे निघाली. टोपलीत वाळलेल्या गोवऱ्या होत्याच. त्या गोवऱ्या परड्यात योग्य ठिकाणी ठेऊन दिल्या आणि ती आता अंघोळीला निघाली. अंघोळ होताच पुन्हा दूध काढण्यासाठी तिची पावले गोठ्याकडे वळली. दूध काढून ती आपल्या घरात आली. दुधाच डीचकी वाष्याला अडकवलेल्या दोरीच्या संगड्यात ठेऊन ती घराच्या अंगणात रांगोळीचा सडा घालायला निघाली. उंबरा पुजवून रांगोळी घालून तिने स्वच्छ अंगाने चूल पेटवली. अन् चहाचं आदन ठेवून स्वयंपाकाची भाजी चिरू लागली. भाजी चिरून होईपर्यंत चहा उकळला होता. त्याच चुलीवर भात आणि पाठीमागे डाळ ठेऊन ती चहा घेऊ लागली. घरातली सगळी कामं आवरून तिला मजुरीसाठी दुसऱ्यांच्या शिवारात जायचं होतं. तिने भरभर स्वयंपाक आवरला. तोवर सासू आणि नवरा उठले होतेच. त्यांना अंघोळीसाठी पाणी देऊन ती अंथरूण पांघरूण घडी करून ठेवू लागली. सासू नवऱ्याच्या अंघोळ्या होताच चहा आणि सकाळची न्याहरी तिने सगळ्यांना दिली. स्वतः कसेबसे चार घास खाऊन ती शेतात जायची तयारी करू लागली.