गावाकडच्या गोष्टी : सरोळी गावातील वारकरी दिंडी

वारकरी संप्रदाय ही महाराष्ट्राच्या सांस्कृतिक जीवनाची अमूल्य परंपरा आहे. "ज्ञानोबा-तुकाराम" या जयघोषाने दुमदुमणारी दिंडी म्हणजे भक्ती, समता, प्रेम आणि सेवाभावाचा उत्सव. आपल्या कोल्हापूर जिल्ह्यातील आजरा तालुक्यातील सरोळी गावातही ही वारकरी परंपरा अनेक वर्षांपासून भक्तिभावाने जपली जात आहे.
आषाढी एकादशी जवळ आली की गावात भक्तिमय वातावरण निर्माण होते. वारकरी पांढरे शुभ्र वस्त्र, डोक्यावर तुळशी वृंदावन, हातात टाळ, मृदंग आणि भगवी पताका घेऊन दिंडीत सहभागी होतात.सकाळी महादेव मंदिर येथे विठ्ठल-रुक्मिणीची मनोभावे पूजा केली.त्यानंतर वीणापूजन करुन दिंडीसाठी गावातील महादेव मंदिराजवळ सर्व वारकरी व अबालवृध जमा होतात. दिंडी गावातील हनुमान गल्ली, पेठ गल्ली व वारकरी गल्ली अशी चालत राहते.
"राम कृष्ण हरी", "ज्ञानोबा-तुकाराम", "पुंडलिक वरदा हरी विठ्ठल" या नामघोषांनी संपूर्ण गाव दुमदुमून जाते. अभंग, भारुडे, हरिपाठ आणि कीर्तन यांमधून संत ज्ञानेश्वर, संत तुकाराम, संत नामदेव, संत एकनाथ यांच्या शिकवणीचा प्रसार केला जातो. प्रत्येक दारासमोर चोपदार, विठ्ठल - रुक्मिणीच्या वेशातील वारक-यांची आनंदाने पूजा केली जाते. महिला आपल्या दारासमोर सुबक रांगोळी काढतात. गावातील महिला या दिंडीत उत्साहाने सामील होतात. त्यांच्या हातात टाळ व मुखी हरीनामाचा जयघोष चालू असतो. दिंडीत त्या झीम्मा - फुगडी खेळतात. दिंडीतील भक्तीमय वातावरणात त्या तल्लिन होऊन जातात. विठ्ठलाची सेवा हीच ईश्वरसेवा या भावनेतून ग्रामस्थ उत्स्फूर्तपणे या दिंडीत सहभागी होतात.