नात्यांची पाऊलवाट ४

जवळपास दहा ते पंधरा मिनिटांनंतर केबिनचा दरवाजा उघडला आणि कामिनी बाहेर आली. तिने आता तो ढगळ टी-शर्ट आणि पायजमा बदलला होता. तिच्या अंगावर एक अत्यंत सुंदर, हलक्या गुलाबी रंगाची शिफॉनची साडी होती, ज्यावर नाजूक चंदेरी बॉर्डर चमकत होती. तिने विस्कटलेले केस छान विंचरून मोकळे सोडले होते, जे तिच्या खांद्यावर रुळत होते. कानात लहान नाजूक झुमके आणि कपाळावर एक छोटी टिकली... कामिनीचे हे नवीन, पारंपारिक आणि अत्यंत देखणे रूप पाहून कौशिक पाहतच राहिला. त्याचा आ वासला होता. तिच्या लावण्याने आणि साधेपणाने कौशिकला एका क्षणासाठी संमोहित केले होते.