नात्यांची पाऊलवाट २

दुसरीकडे, कामिनीची बेकरीत एका मोठ्या ऑर्डरमुळे प्रचंड तारांबळ उडाली होती. त्यातच अचानक आलेल्या या मुसळधार पावसामुळे तिला वेळेवर निघता आले नाही. जेव्हा तिने बाहेर पाहिले, तेव्हा तिला जाणवले, की शाळा सुटून गेली आहे. ती घाबरली. ती घाईघाईने रस्त्यावर आली, पण पावसामुळे एकही रिक्षा थांबायला तयार नव्हती. शेवटी एका रिक्षावाल्याला विनवणी करून ती रिक्षात बसली आणि शाळेकडे निघाली. तिच्या मनात सारखी एकच भीती होती, शार्दूल एकटा असेल, तो घाबरला असेल, मुंबई शहरात तो कोणा अनोळखी माणसाच्या जाळ्यात तर अडकणार नाही ना? चार वर्षांपूर्वीच्या कटू अनुभवांमुळे तिचा पुरुषांवरचा आणि जगावरचा विश्वास उडाला होता.