वाळन पुस्तक परीक्षण

कथासंग्रह वाचताना प्रत्येक वेळी सकारात्मक प्रभाव आणि तसाच सकारात्मक संदेश देण्याचा प्रयत्नही जाणवतो. प्रत्येक कथेला वास्तवाची झालर आहे जी समाजभान, संयम राखून आहे. अनुभवांना कल्पनेची जोड देऊन लेखकाने परंपरा, संघर्ष, परिस्थिती, मानसिकता,.. अधोरेखित करत प्रबोधनाचा ठसा उमटवला आहे असं म्हणता येईल. या सर्वच कथांमधील पात्रं, घटनांमध्ये जिवंतपणा जाणवतो. कदाचित यामुळेच कल्पनेपेक्षा वास्तवाचे भान राखणारे लिखाण मनाला काहीसे जास्तच स्पर्शून जाते याचा प्रत्यय येतो. वऱ्हाडी भाषा समजत नसेल तरीही कथांमधील ती वऱ्हाडी पार्श्वभूमी उत्तमरीत्या वाचकांपर्यंत पोहोचण्यात यशस्वी ठरते. 'वाळन' कथेचा समावेश विद्यापीठाच्या अभ्यासक्रमात झाला आहे हे या कथासंग्रहाच्या परिणामकारकतेचेच यश आहे. ग्रामीण आणि शहरी जीवनाचा समतोल साधत लेखकाने दोन्ही ठिकाणच्या वाचकांना आपलीशी वाटणारी भाषाशैली, विषय मांडून एक उत्तम रचना समोर आणली आहे. या कथासंग्रहाच्या निमित्ताने अतिशय सहजसोप्या भाषेतील उत्तम दर्जाचे साहित्य वाचायला मिळते. समाजाच्या छटा अनुभवत भावनिक, वैचारिक मंथन करायला लावणारे कथानक वाचायला मिळते. पुस्तकात काही तुरळक शब्दचुका आहेत; पण त्या तांत्रिक कारणांमुळे असाव्यात. ग्रामीण वातावरणात रुजलेल्या कथांची ओघवती भाषाशैली, मांडणी, रंजकता वाचकाला खिळवून ठेवतात. निवडक मुद्द्यांचा आणि पात्रांचा वापर करून उत्तम रचना केली आहे असे म्हणता येईल. किचकटपणाही जाणवत नाही, तसेच पुस्तक छोटेखानी आहे. एकूणच पुस्तकाचा साहित्यिक दर्जा, छपाई दर्जा उत्तम आहे असे म्हणता येईल.