व्यसन प्रेमाचे पुस्तक परीक्षण

या कादंबरीच्या निमित्ताने एक गंभीर सामाजिक विषय आकर्षक लेखनशैलीत वाचायला मिळतो. व्यसन या शब्दासोबत समोर उभं राहणारं नेहमीचं चित्र वेगळ्या दृष्टिकोनातून, वेगळेपणाने आणि कदाचित कल्पनेपेक्षा तीव्र परिणामांची झलक दाखवून समोर आणलं आहे. शीर्षकाप्रमाणे यात प्रेम तर आहेच; पण प्रेमासोबत एक उत्कटता, एक वेड, एकप्रकारचा झपाटलेपणा, निरनिराळी व्यसनं,... असं बरंच काही आहे. कोणत्याही वळणावर कादंबरी भरकटलेली वाटली नाही.
भूतकाळ आणि वर्तमानकाळ यांची प्रसंगानुरूप घातलेली सांगड किचकट न वाटता सहजसोपी ठेवणं लेखिकेला छान जमलं आहे. कोर्ट ड्रामा, मानसिक व्यथा अन् उपचार, व्यसनमुक्ती केंद्र, न्याय मिळवून देण्याची धडपड, सूडबुद्धीने निर्माण झालेल्या भावना, व्यसन,... अशी प्रत्येक गोष्ट लेखिकेने उत्तमरीत्या रंगवली आहे. 'माणसाच्या भावनांचा निचरा व्हायला लागला की माणसाची मानसिक स्थिती सुधारतेच; पण त्याच भावना मनात गोठवून ठेवल्या तर माणूस बर्फासारखा गोठून जातो. त्या भावना पाण्यासारख्या वाहत्या झाल्या तर माणूसही पाण्याच्या खळखळाटासारखा प्रवाहित होतो.' यासारखी अनेक वाक्यं आपलीशी वाटून मनात घर करून जातात. खरंतर व्यसनात अडकलेल्या व्यक्तीने हे पुस्तक वाचलं तर त्यांना बऱ्याच गोष्टींची जाणीव होऊ शकते. कारण मानसशास्त्रीय समुपदेशन एकप्रकारच्या रंजकतेने इथे अनुभवायला मिळते. हे चित्तवेधक लेखन अभ्यासपूर्ण आहे हे विशेष. सेक्स ॲडिक्शनवर लिहिणं हे खरंच कौतुकास्पद आहे. कारण काही विषयांवर सहजासहजी बोललं जात नाही. त्यापैकीच हा सेक्स ॲडिक्शन विषय लेखिकेने कथेत असा काही गुंफला आहे की केवळ स्त्रीच्या लैंगिक शोषणाच्या घटनांऐवजी पुरुषाची बाजू मांडणारी स्थिती स्पष्ट होत जाते. जिथे स्त्री असण्याचा फायदा घेतलेली स्त्री आणि सूड, या दोन्ही गोष्टी अधोरेखित होतात. याही पलीकडे जाऊन विचार केला, तर सेक्स ॲडिक्शनसारख्या गंभीर विषयाला हात घालून एका 'मूक' विषयाला वाचा फोडण्याचं काम लेखिकेने केलं आहे आणि ते अतिशय संयमी शब्दांत; पण तितक्याच ताकदीने समोर आलं आहे. व्यसन आणि व्यसनमुक्ती हा विषय एका वेगळ्या पद्धतीने, अभ्यासपूर्ण, तसेच प्रभावीपणे सादर केला आहे. विषयाचा आवाका लक्षात घेता मोजक्या शब्दांत लेखिकेने मुद्देसूद, उद्बोधक, संवेदनशील, वेगळेपणा जपणारी उत्तम रचना केली आहे असं नक्कीच म्हणता येईल. तांत्रिक चुकासुद्धा दुर्लक्षित करण्यासारख्याच तुरळक आहेत. भाषाशैली, विषय, सखोल अभ्यासपूर्ण लेखन, मांडणी, इ. गोष्टी पाहता कादंबरीचा साहित्यिक दर्जा, छपाई दर्जा अतिशय उत्तम आहे असे म्हणता येईल. ही पहिलीच छापील स्वरूपातील कादंबरी असली, तरी लेखिकेच्या आतापर्यंतच्या वाटचालीला साजेशी साहित्यकृती वाचायला मिळते.