तुझं माझं आभाळ पुस्तक परीक्षण

सहजसोपी भाषाशैली ही या कथासंग्रहाची सर्वात जमेची बाजू म्हणता येईल. सामाजिक विषयांवर भाष्य करणारं कथानक कमी शब्दांत, तितकीच परिणामकारकता ठेवून मांडणं लेखिकेला उत्तमरीत्या जमलं आहे. सगळं काही आपल्या आजूबाजूला घडणारं; पण तरीही वाचताना हवंसं वाटणारं. अगदी लहानशा कथा आहेत ज्यात सकारात्मक छटांचा शिडकावा आहे. यात समाज, प्रेम, लग्न, नाती, स्वभाव, सहजता,... असं बरंच काही अनुभवायला मिळतं. विषयाच्या सुरेख मांडणीमुळे वाचताना कंटाळा येत नाही. स्त्रीच्या आयुष्यातील संघर्ष, प्रेमाचे रंग, मानसिकता, परंपरा,... अशा कित्येक मुद्यांना लेखिकेने हात घालून त्यांना योग्य न्याय दिला आहे. पुस्तक वाचल्यावर प्रस्तावनेतील वाक्य आवर्जून आठवतं की या कथांतून स्त्रीलेखनाची नवी दिशा दिसते जी ना अतिशय आक्रमक आहे, ना अतिशय भावुक; तर ती साधी, सच्ची आणि प्रभावी आहे. आणि खरोखरच या कथासंग्रहातील प्रत्येक कथा अशीच प्रभाव पाडणारी आहे. कथेनुसार भाषा सुयोग्य वळणं घेत जाते. काळाची गरज असलेले बरेचसे विषय वाचायला मिळतात हे विशेष. तांत्रिक चुकासुद्धा अगदीच नगण्य असून ओघवती भाषाशैली, मांडणी, विषय, वास्तववादी चित्रण, सकारात्मकता,... अशा अनेक गोष्टी पाहता पुस्तकाचा छपाई दर्जा आणि साहित्यिक दर्जा उत्तम आहे असं म्हणता येईल.