मार्तंड पुस्तक परीक्षण

या कादंबरीच्या निमित्ताने स्वराज्याच्या मावळ्याला पुढे आणणारी एक अनोखी, दर्जेदार ऐतिहासिक प्रेमकथा वाचायला मिळते. ऐतिहासिक पार्श्वभूमी लक्षात घेऊन इतिहासाची मोडतोड न करता ऐतिहासिक-कल्पित लेखन समोर आणण्याचा प्रयत्न लेखिकेला उत्तमरीत्या जमला आहे. शिवरायांचे गुप्तहेर खाते आणि अफझलखानाचे आक्रमण, हे या कथानकातील महत्त्वाचे मुद्दे आहेत. प्रसंगांची गुंफण वाचकांना कथेशी जोडून ठेवते. महत्त्वाच्या ऐतिहासिक पात्रांवर समोर येणाऱ्या कादंबऱ्यांमध्ये एका साधारण तरीही असाधारण अशा मावळ्याची भूमिका, आयुष्य समोर आणण्याचा हा विचार त्या काळाची एक वेगळी बाजू मांडणारा ठरतो. शिवरायांच्या काळातील गुप्तचर विभागाच्या कामाची सूक्ष्म, अभ्यासपूर्ण बाजू हेर विभाग आणि लेखिका दोन्हींच्या कामातील बारकावे लक्षात घ्यायला लावणारी आहे. इतिहास म्हणजे गंभीर विषय ही चौकट काहीशी विसरायला लावून हळव्या, तितक्याच शूर क्षणांची उधळण करत इतिहासाची पाने समोर येतात आणि वाचनात रंजकताही अनुभवायला मिळते. आलंकारिक, ऐतिहासिक, ग्रामीण, राजेशाही,.. अशी प्रत्येक भाषाशैली छान जमली आहे, प्रसंगानुरूप भाषा योग्य वळण घेते. ज्यामुळे वाचक खिळून राहतात. ऐतिहासिक लेखन न आवडणाऱ्यांनाही आवडेल अशी ही कादंबरी. लेखिकेने ऐतिहासिक आणि काल्पनिक घटनांचे खुलासे करून यालाच इतिहास समजू नये ही विनंती केल्याने वाद, आक्षेप नक्कीच टाळले जातील. कादंबरी कुठेही भरकटलेली न वाटता सहज, चित्तवेधक आहे. तांत्रिक चुकासुद्धा तुरळक प्रमाणात आहेत. संदर्भांचा उल्लेख केल्याने विश्वासार्हता वाढते. भाषाशैली, मांडणी, विषय, सखोल अभ्यासपूर्ण लेखन, इ. गोष्टी पाहता कादंबरीचा साहित्यिक दर्जा, छपाई दर्जा अतिशय उत्तम आहे असे म्हणता येईल.