केळफूल पुस्तक परीक्षण

या कथासंग्रहाच्या निमित्ताने काही नेहमीचे, आसपास घडणाऱ्या घटनांचे विविधांगी पैलू समोर आणणारे प्रसंग परिणामकारकरीत्या समोर येतात. वास्तवाला कल्पकतेची झालर म्हणावी अशा या कथांमधून वास्तवाचे बाण मनात टोचत राहतात. काही कथा 'ओपन एंड कथा' प्रकारच्याही वाटू शकतात. त्यामुळे अपूर्णतेचा शिक्का न देता त्या शेवटानंतरच्या शक्यतांचा विचार करण्याला वाचकांना वाव आहे. नणंद या शब्दाचा अर्थ नव्याने सांगणाऱ्या कथांची रेलचेलसुद्धा नाती नव्याने समजायला लावणारी आहे. किंबहुना प्रत्येक कथेत मांडल्या गेलेल्या नात्यांचा विचार दृष्टिकोनाला नवा मुलामा देणारा ठरतो. तिची स्वप्नं, जबाबदाऱ्या, नाती, हतबलता, नियती, प्रेम या साऱ्या गोष्टींना इथे वाचा फुटते. स्त्री विश्वाच्या छटांचा हा संगम कधी हळवं व्हायला लावतो तर कधी कठोर! कथांची पार्श्वभूमी एकप्रकारची परखडताही घेऊन येते. शीर्षकाला साजेसे स्त्रीच्या आयुष्यातील विविध पदर इथे उलगडतात. लेखिकेच्या ओघवत्या भाषाशैली आणि मांडणीमुळे कथा वाचताना कुठेही क्लिष्टता जाणवत नाही. पुस्तकात काही शब्दचुका आहेत; पण त्या तांत्रिक कारणांमुळे असाव्यात. भाषाशैली, विषय, मांडणी, वास्तवाची जाणीव, सकारात्मकता,... अशा अनेक गोष्टी पाहता पुस्तकाचा छपाई दर्जा आणि साहित्यिक दर्जा उत्तम आहे असं म्हणता येईल.