गुज अंतरीचे पुस्तक परीक्षण

या कथासंग्रहात रहस्य, गूढ, विज्ञान, अध्यात्म,... अशा अनेक विषयांची झलक पाहायला मिळते. या कथा मानवी मनाला केंद्रस्थानी ठेवून भावनिक, वैचारिक मंथन करायला लावतात. मन, मनावरील ताबा यांभोवती फिरणाऱ्या सर्वच कथा जशा हलक्याफुलक्या स्वरूपाच्या, तरीही गूढतेने व्यापलेल्या आहेत; तशीच सदर पुस्तकातील सर्वात दीर्घ कथा 'गुप्त संघर्ष' एका वेगळ्या पद्धतीने समोर आली आहे. या कथेतील गंभीरता, अध्यात्म, विज्ञान, कल्पना, अभ्यास, अशा अनेक गोष्टींचा मिलाफ आपल्याला एका वेगळ्या विश्वात घेऊन जाणारा ठरतो. अशा प्रकारच्या विषयावरील कथा न आवडणाऱ्या वाचकांना कदाचित ही कथा इतर कथांच्या तुलनेत थोडीशी वेगळी वाटू शकते; पण ही कथा वेगळेपण जपणारी आहे एवढं नक्की! 'एका बाहुलीची गोष्ट' कथेत तंत्रविद्या आणि मानवी भाबडेपणाच्या विश्वाला असं काही रंगवलं आहे की मला व्यक्तिशः ही कथा खूप आवडली. रहस्यमय वातावरणात सजलेल्या या पुस्तकाची ओघवती भाषाशैली, मांडणी, अभ्यासपूर्ण लेखन, रंजकता वाचकाला खिळवून ठेवतात. रहस्य, गूढ हाताळणं लेखिकेला छान जमलं आहे. तांत्रिक चुकासुद्धा अगदीच नगण्य आहेत. एकूणच साहित्यिक आणि छपाई दर्जा उत्तम आहे असं म्हणता येईल.