मधुमालती - नवी ओळख भाग एक

बाहेरचा हा सगळा तमाशा मालती ताई ऐकत होत्या. ते ऐकून त्यांना तिथे एक क्षणभर थांबण्याची इच्छा होत नव्हती. कशी -बशी त्यांनी भाजी निवडली आणि त्या पळतच आपल्या रूममध्ये गेल्या. गादीवर डोकं ठेवून अक्षरशः ओक्साबोक्शी रडल्या.
शांत हो,असं म्हणायलाही त्यांच्याजवळ कोणीही नव्हतं.
दहा पंधरा मिनिटांनी स्वतःच रडून रडून शांत झाल्या.
समोर एका टेबलावर मोहनरावांचा फोटो होता. मोहनराव,त्यांचे मिस्टर. दोन वर्षे उलटली होती त्यांना जाऊन.
मालती आणि मोहनरावांना दोन मुले. दोघांचेही लग्न त्यांनी मोठ्या थाटात केले.
थोड्या दिवसात,लहान मुलगा अमितला कंपनीतर्फे अमेरिकेला जाण्याचा चान्स मिळाला. त्यामुळे मालती ताई,मोहनराव,अंकित,रेवा आणि अमित ची बायको श्वेता असे सगळे मिळून राहत होते. परंतु अचानक मोहनराव हृदयविकाराच्या झटक्याने गेले आणि मालती ताई एकट्या पडल्या.
वडिलांना जाऊन वर्ष झाल्यावर अमित श्वेतालाही अमेरिकेला बरोबर घेऊन गेला.
आता अंकित,रेवा आणि मालती ताई असे तिघेच राहिले होते.