खेळ नशिबाचा भाग 1

"हो, ना! आपली मुले दुःखात असली किंवा आजारी असली की आई वडिलांना खूप काळजी वाटते. अमृताची तब्येत बघून माझे तर हातपायच गळले होते. डॉक्टरांनी आता सर्व व्यवस्थित आहे असे सांगितले, तेव्हा जीवाला थोडे बरे वाटले.
पण अमेयच्या आई-वडिलांची परिस्थिती कशी असेल? याचा विचार करूनच कसे तरी होते आहे. अमृताला असे सोडून तिथे जाऊ पण शकत नाही आणि त्यांच्यासमोर कसे जावे? तेवढी हिंमत पण नाही माझ्यात. अमेयने असे नको करायला हवे होते. स्वतःचे आयुष्य संपवले आणि इतरांनाही खूप मोठे दुःख देऊन गेला. त्याच्या व अमृताच्या प्रेमाला आपण दोघी कुटुंबानी स्वीकारले होते आणि लग्नाचा विषयही सुरू झाला होता. या आनंदाच्या बातमीने अमृता व अमेय दोघेही किती आनंदी झाले होते! त्यांचे आनंदी चेहरे पाहून आपणही किती आनंदी झालो होतो! आणि आता हे असे कसे झाले? कुणाची नजर लागली पोरांच्या सुखाला? अमेय गेला आणि अमृताची अशी स्थिती! काय म्हणावे या सर्वाला?"