हे बंध रेशमाचे पर्व दुसरे भाग २

दोन दिवसांनी सगळ्याजणी जमा झाल्या. प्रत्येकीने येताना आंबील घुगऱ्या, दहीभात, पुरणपोळ्या आणि पारूबाईला उभायत पोशाख आणला होता. ते पाहून पारूबाई हरखली होती. आई-वडिलांना एकत्र उभे करून तिन्ही मुलींनी दोघांचे पाय धुतले आणि दोघांना हळदीकुंकू लावून त्यांच्या हातात संपूर्ण पोशाख दिला आणि खाली वाकून नमस्कार केला. त्यानंतर आणलेल्या आंबील घुगऱ्या , दहीभात त्यांनी सगळीकडे विस्कटला. खरंतर दहीभात आंबील घुगऱ्या या गोष्टी राखणदारासाठी असतात. देवीचे जे सैनिक असतात त्यांच्यासाठी हा नैवेद्य असतो असे सांगितले जाते. त्यामुळे वास्तूत शांतता राहावी, जमिनीखाली उकरल्यामुळे दुखावले गेलेल्या अगर हातून मरण पावलेल्या सूक्ष्म जीवांना खरंतर श्रद्धांजली वाहायला हवी. संपूर्ण विधी पूर्ण झाला आणि सगळेजण घराकडे आले. सगळ्यांची जेवणे भांडीकुंडी सगळं उरकेपर्यंत तीन वाजून गेले.