विषारी स्पर्श : भाग १५.

ती जणू गाढ झोपेत गेल्यासारखी वाटत होती. संकट टळल्याची जाणीव तिच्या शांत श्वासांमध्ये स्पष्ट जाणवत होती. बाबांनी आपल्या शिष्यांकडे पाहिले आणि हातानेच हलका इशारा करून त्यांना सगळे आवरण्यास सांगितले. घरात हळूहळू पुन्हा शांतता पसरू लागली. परंतु अब्बूची मनःस्थिती मात्र अजूनही फारच ढासळलेली होती. जे काही त्यांनी काही वेळापूर्वी पाहिले होते… जे काही त्यांच्या कानांनी ऐकले होते… त्या सगळ्याने त्यांच्या मनावर एक प्रचंड आघात झाला होता. आयुष्यभर ज्या प्रमाण-मूल्यांवर ते जगत आले होते, त्या सगळ्यांनाच जणू या घटनेने प्रश्नचिन्ह लावले होते.