DINK भाग 45

" तुझे म्हणणे अगदी बरोबर आहे पण आपण त्यांना आपल्या सेंटरची सकारात्मक बाजु दाखवू. त्यांना पोस्ट पार्टम डिप्रेशनच्या काळात स्त्रीच्या शरीरात होणारे बदल बाळ व बाळाच्या आई साठीच नाही तर संपूर्ण कुटुंबातील सदस्यांसाठी किती घातक ठरू शकतात हे आपण समजावून सांगू. त्यात आपल्यासाठी मजबूत बाजू ही राहणार की आताच्या काळात बऱ्याच तरुण मुलींना सासू-सासरे नको असतात, इतकेच काय सासूबाईलाही सुनबाईचं करायचं नसतं, कुठे कुठे बाळच इतक्या उशिरा ठेवले जाते की घरातील मोठे अगदीच म्हातारे झाले असतात, काही परिवारात घर कामावरून एकमेकांशी जुळवून घेणे कठीण झालेले असते. अशावेळी त्या नवीन बाळंत स्त्रीला संपूर्ण आराम मिळावा या उद्देशाने काही पैसे खर्च करायला कोण तयार होणार नाही. त्यातही बाळंतीण स्त्री स्वतः जर कमावती असेल तर स्वतःला आराम देण्यासाठी ती नक्कीच पैसे खर्च करेल." पिहूने समजावून सांगितले.