असं उलगडलं रहस्य

"आई बाबा मला माफ करा. मी संपत्तीच्या मोहापायी माझ्या मालिनी ताईचा खून केला. बाबा तुम्ही त्या दिवशी सांगितलं माझ्या आणि ताईच्या नावावर अर्धी अर्धी संपत्ती केली तेव्हा मला तुमचा आणि ताईचा दोघांचा खूप राग आला तेव्हाच मी ताईला संपवायचं ठरवलं. ताईला संपवल्यावर मी आर्यांचा काटा काढणार होतो. त्या दिवशी मी संधी निर्माण केली. रात्री घरातून बाहेर गेलो आणि लपूनछपून भिंतीवर चढून आत आलो. त्यावेळी ताई तिच्या रूममध्ये जाते ते मला माहित होते. म्हणून मी दबा धरून बसलो. इतक्यात आर्या खाली आली म्हणून मी तिला चॉकलेट उघडून देऊन वरती पाठवलं. आर्या कधीही येऊ शकते म्हणून मी तिच्यासाठी चॉकलेट घेऊन ठेवलं होते. चॉकलेटचा कागद मुद्दाम माझ्या पॅन्टच्या खिशात ठेवला. मला कोणताही पुरावा ठेवायचा नव्हता. मी किचन मधला सुरा त्याच्या हँडलवर रुमाल ठेवून आणला होता. ताई वर जाण्यासाठी आल्याबरोबर मी तिच्या पोटात सुरा खुपसला आणि मुद्दाम सुरा काढला नाही. गणेश मुर्खासारखा सुरा काढायला जाईल आणि त्याच्यावर आळ येईल याची मला खात्री होती. झालेही तसेच."