लग्नगाठी, खरंच स्वर्गातच बांधल्या जातात का ?

"लग्नगाठी (पूर्वकर्मांनुसार) स्वर्गात, ईश्वराच्या इच्छेनेच बांधल्या जातात," या विचारावर माझा आजही पूर्ण विश्वास आहे. कोणी मानो अथवा न मानो, प्रत्येकाला आपले मत मांडण्याचा अधिकार आहे. पण आयुष्यात असंख्य घटना पाहिल्यानंतर, अनेक संसार जवळून अनुभवले आणि नात्यांचे चढउतार समजून घेतले, तेव्हा हा विश्वास अधिक दृढ झाला.
आपण कितीही प्रयत्न करतो. मुलासाठी किंवा मुलीसाठी स्थळं पाहतो. शेकडो फोटो पाहिले जातात, अनेक भेटी होतात, चर्चा होतात, पत्रिका जुळतात, अपेक्षा तपासल्या जातात. "हीच योग्य जोडीदार असेल" असे वाटून निर्णय घेतला जातो. पण शेवटी जुळते तीच जोडी, जी नियतीने आधीच ठरवून ठेवलेली असते.
कधी एखादे उत्तम स्थळ अगदी शेवटच्या क्षणी मोडते आणि मनाला खूप वेदना होतात. त्या वेळी वाटते, "हे माझ्याच बाबतीत का?" पण काही काळानंतर जेव्हा अधिक योग्य व्यक्ती आयुष्यात येते, तेव्हा लक्षात येते की त्या वेळी झालेला नकार हा ईश्वराचा नकार नव्हता; तो पुढच्या चांगल्या आनंदाची तयारी होती.