अंत: अस्ति प्रारंभ: | भाग ४२

आता मात्र त्याच्या नजरेसमोर सगळ्या सातही तरुणी उभ्या राहिल्या. त्यांची नावे आजही त्याला स्पष्टपणे आठवत होती.अर्थात गेल्या वर्षभरातील  घटना होत्या त्या ! अंजू तीन नंबरची तरुणी होती. तिच्या आधीच्या दोघीजणींमध्ये सर्वात पहिला नंबर अनिताचा होता.  अनिता तिच्या पतीसोबत हनिमूनला मसूरी येथे आली होती. ती दोघे नाशिक वरून आली होती. त्यावेळी राहुल मसूरी मध्येच होता. तो ज्या हॉटेलमध्ये राहिला होता त्याच हॉटेलमध्ये हे जोडपे त्याला काउंटर वर एन्ट्री करताना दिसले होते.तो नेमका हाॅटेलमधून चेकआऊट करत होता.तेव्हाच त्याच्या लक्षात आले होते की हे जोडपे महाराष्ट्रातून आलेले आहे. त्यामुळे तो तिथेच खुर्चीवर बसून राहिला होता. ते किती दिवस रहाणार आहेत  याचा कानोसा त्याने घेतला होता. दुपारी दोघे जेव्हा जेवायला  हॉटेलच्या हॉलमध्ये आले तेव्हा त्यांच्या मागोमागच राहुलही जेवणाच्या हॉलमध्ये शिरला होता.  त्या दोघांचे  एकमेकांशी काय बोलणे होते याकडे त्याचे लक्ष होते.त्यांच्या मागच्या टेबलवरच तो बसला होता.