अधिरा (भाग -१ )

दोन दिवसांपूर्वी अधिरा आणि अनुप यांचा दोन्ही घरच्या संमतीने साखरपुडा झाला होता. घरगुती साखरपुडा असूनही अनुपच्या आईवडिलांनी बऱ्याच मागण्या केल्या होत्या. अधिरा एकुलती एक मुलगी असल्याने तिच्या आईवडिलांनी काहीही आढेवेढे न घेता त्या मागण्या पूर्ण केल्या होत्या. पण त्या पूर्ण करताना त्यांची काय अवस्था होत होती हे तिने पाहिले होते. तिच्या लग्नासाठी ठेवलेली ठेव त्यांनी साखरपुड्यातच खर्च केली होती. लग्नही थाटामाटात व्हावे ही अनुपच्या घरांच्याची मागणी होती. त्यात त्यांनी खूप अवास्तव सोने, गाडी, किमती वस्तू आणि टू बी एच के फ्लॅटचीही मागणी केली होती. तेही त्यांच्या मुलीकडच्या वरपक्षाने मागितले म्हणून मागतोय, नाही तर आम्ही मागितले नसते. सध्या आमचे तेवढे बजेट नाहीये. (चेहऱ्यावर गंभीर भाव आणत) असंही तुम्ही तुमच्या मुलीला देतच आहात तर ते आमचेच झाले ना आणि रूढी, परंपरा, चालीरिती आपण कसे टाळू शकतो ना.' ते हसत म्हणाले  होते.