व्यासांच्या मानसकन्या भाग एकवीस (याज्ञसेनी द्रौपदी)

आम्ही हस्तीनापुरला आलो आणि अर्ध राज्य म्हणून आम्हाला खांडवप्रस्थ मिळालं. त्याचं माझ्या पतींनी इंद्रप्रस्थ केलं. एकदा मी आणि युधिष्ठिर एकांतात बसलो होतो. विवाहाच्या वेळी, पाच जणांसोबत एकांतात असताना आम्ही काही नियम बनवले होते. मी ज्याच्या बरोबर असेल त्यावेळी इतर चौघांपैकी कुणीही तिथे येऊ शकत नव्हते. त्यावेळी काहीतरी गैरसमजाने अर्जुनाला त्याची शस्त्र घेण्याकरिता आमच्या दालनात यावं लागलं, त्याच्याने नियम भंग झाला आणि तो प्रायश्चित्त घेण्याकरिता वनवासात गेला. त्या वनवासात त्याने आणखीनही विवाह केले, नागकन्या उलुपी, मातामह घराणं चालवणारी चित्रांगदा, आणि प्रत्यक्षात कृष्णाची बहीण सुभद्रा त्याच्या आयुष्यात आल्या. कर्तुत्ववान योद्धा आणि वीर पुरुष म्हणून अर्जुनाला अनेक विवाह करता आले. परंतु माझ्या सौंदर्यामुळे मला पाच जणांची होऊन राहावं लागलं. माझ्या पतींनी त्यानंतर मोठा राजसयू यज्ञ केला. राजसयू यज्ञाकरिता आर्यावरतातून सर्व राजे आले होते आणि त्यांनी जो आहेर आणला त्याची नोंद ठेवण्याचं काम पांडवांनी दुर्योधनाला दिलं होतं. आम्हाला कफल्लक बनवून ज्या कौरवांनी आमचं हसं केलं त्याच कौरवांना माझ्या पाच पतींनी अमाप संपत्तीचं भांडार काय असतं आणि वीराचं वीर्यबल काय असतं हे दाखवून दिलं.